Da Pont Sant Esprit a Lo Vigan, un aigavèrs entre dui monds
236 KM 11 jorns de chamin
Vasts orizonts, cèls lindes embe de blanchas nívolas que puntejon las pradarias d’ombras netas. Vaquí lhi espacis airós des Cevènas, ente s’arribava embe de passatges aerencs al lòng des gòrjas de l’Ardècha e dal Chassezac, darrier baloard dal Metzjorn ai pè dal Massís Central. Dins un viatge que dona tot o esquasi sus la mar Mediteranna, las Cevènas consenton un’incursion dins d’ambients mai continentals, sovent al delai de l’aigavèrs que separa lhi flums que davalon vèrs nòstra mar d’aquilhi que lhi viron las espatlas, en preferent lo grand nòrd de l’Atlàntic. Mas es sobretot l’istòria a capturar l’atencion dal viatjaire. Ental sècle XVII las populacions des Cevènas fagueron una chausia clara: aderieron a la reforma protestanta de Joan Calvin, en virant decò ilhs las espatlas a Roma e al mond latin. Lor chausia menet sus aquestas montanhas una lònja seria de persecucions e de vertadieras guèrras de religion. Encara encuei colpís lo caràcter austèr de lhi insediaments, dont al centre lhi a sempre un temple, despulhat d’images, d’òrs e d’orpèls, mas aculhent dins sa sevèra simplicitat borguesa. De vilatges, coma Lo Blaimard e Pont de Montvèrd, son de vertadiers joièls de peira, ben sovent lo mesme granit que forma l’ossadura dal massís e que se leva dins l’ampla dorsala dal Mont Lozèra. Lo departament que pren lo nom d’aquesta montanha vanta un primat en França: la pus bassa densitat d’abitants (15) per quilomètre cairat. Lo monde es partit en massa, es emigrat. Derant la Premiera Guèrra Mondiala a començat a se portar via lhi òmes pus fòrts e joves, puei son arrribaas las indústrias dal nòrd e l’agricultura especializaa dal Metzjorn. Après la Seconda Guèrra s’es completaa l’òbra de despoplament e la pèrda d’un baron d’activitats de la tradicion. Lhi darriers ans laisson entreveire lhi senhs d’una controtendença, embe l’insediament sus aquestas montanhas d’un baron de neo, neo-resistents, que laisson las gròssas vilas per chausir una vita alternativa. Lo parc nacional, en mai d’aquò, a l’objectiu de gardar la biodiversitat d’un ambient ente l’interacion entre l’òme e la natura es antica depuei de sècles. Pr’aquò promòu las activitats sosteniblas coma l’agricultura, la silvicultura e lo torisme excursionístic. Dins la zòna de majora proteccion dal parc trabalhon a pauc près 400 empresas agro-pastoralas: lo charme d’aquestas tèrras es encara encuei lo chamin sus la dralha, lo chamin de la transumança al lòng des clausuras de fil espinat que se pèrdon vèrs l’orizont.
Las tapas:
21 – Da Pont Sant Esprit a Aiguèza
22 – Da Aiguèza a La Bastida lo Virac
23 – Da La Bastida lo Virac a Comps
26 – Da Vilafòrt a Le-Bleimard
27 – Da Le-Bleimard a Le Pont de Montvèrt
28 – Da Le Pont de Montvèrt a Florac
29 – Da Florac a Barra des Cevènas